लोणंद येथे मयुरेश्वर मित्र मंडळाचा सामाजिक उपक्रमांचा आदर्श; पर्यावरणपूरक व शिस्तबद्ध गणेशोत्सव

'मयुरेश्वर मित्र मंडळ, लोणंद' यांच्या वतीने यावर्षीचा गणेशोत्सव अत्यंत उत्साहपूर्ण, शिस्तबद्ध आणि विविध सामाजिक उपक्रमांच्या माध्यमातून साजरा करण्यात आला. मंडळाने केवळ धार्मिक परंपरेपुरते मर्यादित न राहता समाजाभिमुख उपक्रमांवर भर देत एक आदर्श घालून दिला आहे. उत्सवाच्या काळात मंडळाच्या वतीने रक्तदान शिबीर आणि सर्वसामान्य नागरिकांसाठी आरोग्य तपासणी शिबीराचे आयोजन करण्यात आले होते. यासोबतच निसर्गसंवर्धनाचा संदेश देत मोठ्या प्रमाणावर वृक्षारोपण करण्यात आले. सामाजिक जनजागृतीचा भाग म्हणून 'मोरगाव ते लोणंद' दरम्यान जोत रॅली काढून विविध सामाजिक संदेश पोहोचवण्यात आले, तसेच 'प्लास्टिक बंदी'बाबत नागरिकांमध्ये जागृती करण्यात आली. लहान मुलांच्या कलागुणांना वाव देण्यासाठी विविध क्रीडा व सांस्कृतिक स्पर्धा आणि महिलांसाठी भव्य दांडिया उत्सवाचे आयोजन करण्यात आले होते. या सर्व कार्यक्रमांनंतर भाविकांसाठी महाप्रसादाचे आयोजन करण्यात आले, ज्याचा हजारो नागरिकांनी लाभ घेतला. विशेष म्हणजे, विसर्जन मिरवणुकीत कोणत्याही प्रकारचा डॉल्बी किंवा डीजेचा वापर न करता पारंपरिक वाद्यांच्या गजरात, शांततेत आणि पर्यावरणपूरक वातावरणात श्रींचे विसर्जन करण्यात येते. मयुरेश्वर मित्र मंडळाच्या या सर्व उपक्रमांचे व डॉल्बीमुक्त शांततापूर्ण विसर्जन सोहळ्याचे लोणंद परिसरातील नागरिकांकडून विशेष कौतुक होत असते.

Kind

Story

Place

Satara

Art

Rules of Discipline (Vainayikī vidyā) · Kala 63

Contributed by

Recorded, name withheld by the contributor

Submitted

22 September 2026

Accepted

22 September 2026