🌺 गणरायाचा आवडता – पारंपारिक महाराष्ट्रीयन उकडीचा मोदक 🌺

१. गोड सारण तयार करणे कढईत तूप गरम करून त्यात खसखस हलकी भाजून घ्यावी. त्यामध्ये ताजा किसलेला नारळ आणि गूळ घालून मंद आचेवर परतावे. मिश्रण जास्त कोरडे न करता गूळ वितळून सारण घट्ट होईपर्यंत शिजवावे. शेवटी वेलची व जायफळ पूड घालून मिश्रण थंड होऊ द्यावे. २. मऊसूत उकड तयार करणे एका पातेल्यात पाणी, तूप आणि मीठ घालून उकळी आणावी. पाणी उकळू लागल्यावर त्यात तांदळाचे पीठ एकदम घालून लगेच ढवळावे. झाकण ठेवून मंद आचेवर 2–3 मिनिटे वाफ येऊ द्यावी. मिश्रण थोडे कोमट असतानाच हाताला थोडे तूप व पाणी लावून उकड व्यवस्थित मळून घ्यावी. उकड जितकी मऊ आणि लवचिक, तितके मोदक सुंदर आणि नाजूक तयार होतात. ३. मोदकाला पारंपरिक आकार देणे उकडीचा छोटा गोळा घेऊन अंगठा व बोटांच्या साहाय्याने त्याची पातळ वाटी तयार करावी. त्यामध्ये तयार केलेले नारळ-गुळाचे सारण भरावे. नंतर कडांना बारीक घड्या/पाकळ्या पाडून त्या अलगद एकत्र आणाव्यात आणि मोदकाचा पारंपरिक शिखराचा आकार द्यावा. ४. वाफवणे मोदकपात्राला किंवा इडलीपात्राला तूप लावून मोदक ठेवावेत. पाण्याची चांगली वाफ आल्यावर मोदक 10–12 मिनिटे वाफवावेत. मोदकाची उकड किंचित पारदर्शक आणि मऊ दिसू लागली की मोदक शिजले आहेत असे समजावे.

Kind

Recipe

Place

Satara

Art

Cooking (Citra-śāka-pūpa-bhakṣya-vikāra-kriyā) · Kala 42

Contributed by

Recorded, name withheld by the contributor

Submitted

22 September 2026

Accepted

22 September 2026