modak

सारण बनवणे: ​कढईत १ चमचा तूप गरम करून त्यात खसखस थोडी परतून घ्या. ​त्यात गवलेला नारळ आणि बारीक चिरलेला गूळ घाला. ​मंद आचेवर मिश्रण एकत्र हलवत राहा. गूळ वितळून मिश्रण एकजीव होईपर्यंत (सुमारे ५-७ मिनिटे) परता. ​सारण जास्त सुकू देऊ नका, नाहीतर कडक होईल. शेवटी वेलची-जायफळ पूड घालून मिक्स करा आणि गॅस बंद करून सारण थंड होऊ द्या. ​२. उकड काढणे: ​एका भांड्यात १ कप पाणी, १/२ चमचा तूप आणि चिमूटभर मीठ घालून उकळी येऊ द्या. ​पाणी उकळल्यावर गॅस मंद करा आणि त्यात १ कप तांदळाचे पीठ घाला. ​लाटण्याने किंवा चमच्याने पीठ पाण्यात पटकन मिक्स करा. ​झाकण ठेवून मंद आचेवर २ ते ३ मिनिटे वाफ काढू द्या. त्यानंतर गॅस बंद करा. ​हे गरम पीठ एका परातीत काढून घ्या. हाताला थोडे थंड पाणी लावून पीठ छान मऊ मळून घ्या. (पीठ मऊ मळले तर मोदक फुटत नाहीत). ​३. मोदक वळणे: ​मळलेल्या पिठाचा लिंबाच्या आकाराचा गोळा घ्या. ​हाताला थोडे तूप किंवा पाणी लावून गोळ्याची पारी (वाटीसारखा आकार) तयार करा. कडा पातळ आणि मधला भाग थोडा जाड ठेवावा. ​अंगठा आणि शेजारच्या बोटांच्या साहाय्याने वाटीला ५ ते ७ कळ्या (पाकळ्या) पाडा. ​तयार वाटीत १ ते १.५ चमचा सारण भरा. ​सर्व कळ्या एकत्र आणून वरच्या बाजूने बंद करा आणि मोदकाचा टोकदार आकार द्या. (कळ्या पाडणे कठीण वाटत असल्यास तुम्ही मोदकाच्या साच्याचा वापर करू शकता.) ​४. मोदक वाफवणे: ​चाळणीला थोडे तूप लावा किंवा त्यावर सुती ओला कपडा/केळीचे पान ठेवा. ​तयार केलेले मोदक थोड्या थोड्या अंतरावर ठेवा. ​मोदकांवर पाण्याचा शिडकावा मारा. ​एका मोठ्या भांड्यात पाणी उकळत ठेवून त्यावर ही चाळणी ठेवा आणि झाकण लावून मध्यम आचेवर १० ते १२ मिनिटे मोदक वाफवून घ्या. ​वाफवल्यानंतर मोदकांवर छान चमक येते.

Kind

Recipe

Place

Thane

Art

Cooking (Citra-śāka-pūpa-bhakṣya-vikāra-kriyā) · Kala 42

Contributed by

Recorded, name withheld by the contributor

Submitted

21 September 2026

Accepted

21 September 2026