अंधश्रद्धेतून श्रद्धेकडे… ५५० वर्षांनंतर पुन्हा घरी गणरायाचे आगमन! 🙏

माझे नाव मल्लिनाथ जमादार. मी मूळचा सोलापूर जिल्ह्यातील अक्कलकोट तालुक्यातील बासलेगाव येथील रहिवासी आहे. आमच्या कुटुंबात पूर्वी गणपतीची स्थापना केली जात होती, अशी पूर्वजांकडून माहिती होती. मात्र गणपती आगमनाच्या दिवशी काही अनर्थ घडल्यामुळे आणि आमच्या पूर्वजांकडे असलेल्या जोकमारा राजा यांच्या मूर्तीची परंपरा असल्याने, गणपती व जोकमारा राजा यांचे तोंड परस्परांकडे पाहू नये, अशी रूढी निर्माण झाली. त्यामुळे आमच्या घरातील गणपतीची परंपरा जवळपास ५५० वर्षांपासून खंडित होती. यावर्षी माझा अवघा तीन वर्षांचा मुलगा शिवांश याने, “पप्पा, आपण यावर्षी गणपती आणूया,” असा आग्रह धरला. त्याने “आपल्या घरी गणपती का बसवत नाही?” असा निरागस प्रश्न विचारला आणि आम्हालाही या परंपरेचा नव्याने विचार करण्यास प्रवृत्त केले. आम्ही सर्वांनी विचारपूर्वक निर्णय घेतला की श्री गणेश हे प्रथम पूज्य दैवत असून प्रत्येक शुभ कार्याची सुरुवात गणेशवंदनेने होते. त्यामुळे भीती आणि अनिष्ट रूढींपेक्षा श्रद्धा, सकारात्मक विचार आणि नव्या पिढीला चांगले संस्कार देणे महत्त्वाचे आहे, असा विचार करून यावर्षी ५५० वर्षांपूर्वी खंडित झालेली गणपती स्थापनेची परंपरा पुन्हा सुरू केली. आज आमच्या घरी मोठ्या भक्तिभावाने आणि उत्साहाने गणेशोत्सव साजरा होत आहे. या नव्या सुरुवातीचे श्रेय माझ्या छोट्या शिवांशला जाते. त्याच्या निरागस प्रश्नाने आमच्या कुटुंबाला भीतीतून श्रद्धेकडे आणि रूढीतून सकारात्मक विचारांकडे जाण्याची प्रेरणा दिली. गणपती बाप्पा मोरया! मंगलमूर्ती मोरया! 🙏🌺

Kind

Story

Place

Osmanabad

Art

Rules of Discipline (Vainayikī vidyā) · Kala 63

Contributed by

Recorded, name withheld by the contributor

Submitted

19 September 2026

Accepted

19 September 2026