आशीर्वाद श्री गणरायांचे

वक्रतुण्ड महाकाय सूर्यकोटि समप्रभ । निर्विघ्नं कुरु मे देव सर्वकार्येषु सर्वदा ॥ स्वप्नवत वाटणारी श्री गणरायांची ओहळे परिवाराघरी स्थापना करण्यात आलेली कहाणी आहे. ही फक्त माझ्या परिवाराचीच कहाणी नसून आमच्याशी संबंधित असलेल्या प्रत्येकाची साथ स्थापनेच्या पहिल्या वर्षीपासून आतापर्यंत मिळत असलेल्या साथीची आहे. जरी श्री गजानन आमच्या घरात विराजमान होत असले तरी त्याचे स्वरूप सार्वजनिकच आहे कारण हे श्री गजानन आम्ही आधी राहत असलेल्या घरी म्हणजे काळाचौकीतील आमचे सख्खे शेजारी ज्यांच्या बरोबर आमचे तीन-तीन पिढ्यांचे संबंध आहेत अशा प्रदीप हळदणकर, गणेश पाबळे, अशोक नायक, अरुण व विनोद पांडे परिवार, मोनू सिंग परिवार तसेच गेली तीन वर्ष आमच्या बदलापूर येथील घरी श्री गजानन विराजमान होतात. येथे सुद्धा आमचे शेजारी पंकज शर्मा, रुपेश सपकाळ, राजनयन चव्हाण, कृष्णा कोट्टल यांचा परिवार या प्रत्येक परिवारास आमच्याकडे विराजमान होणारे श्री गजानन त्यांचेच असल्यासारखी सेवा करतात. अजूनही काळाचौकी येथील सर्वजण बदलापूरला श्री गणेशांची सेवा करण्यासाठी येतात. रविवार, ८ ऑगस्ट १९९९ रोजी सुट्टीच्या दिवशी मी, माझी पत्नी सौ. कल्पना व आमचे नुकतेच बोबड्या बोलात बोलू लागलेले चिरंजीव रथिन फिरायला गेलो असताना रस्त्यावरील एका श्री गणेश चित्रशाळेत बाप्पांना पाहून रथिन श्री गणरायांना मिठी मारून "बाबा पैस दी, घली घेऊन चल" असे म्हणून रडायला लागला. रात्री झोपेत सुद्धा तेच. मग दुसऱ्या दिवशी माझ्या बहिणीचे पती, ब्रह्मवृंदातून शिक्षण घेतलेले सतीश कुलकर्णी यांना याबद्दल विचारले असता आमच्या पत्रिका पाहून त्यांनी श्री गणरायाच्या आगमनाचा मुहूर्त चांगला असून देवच रथिनच्या मुखातून तुझ्या घरी विराजमान व्हायचे आहे हे सांगत आहे असे म्हणून आम्हाला श्री गणपतीची प्राणप्रतिष्ठा करायला सांगितले. निर्णय घेतल्यावर माझी आई व आमचे स्नेही शेजारी हळदणकर यांनी स्थापनेपासून विसर्जनापर्यंत प्रत्येक विधींमध्ये आम्हाला मार्गदर्शन केले. त्या वर्षी गणेश चतुर्थी रविवार, १३ सप्टेंबर १९९९ रोजी होती म्हणजे तयारीला फक्त महिनाभराचा अवधी शिल्लक होता. पण एकदा निर्णय घेतल्यावर उल्लेख केलेल्या प्रत्येक कुटुंबातील प्रत्येक सदस्यांनी कंबर कसून घराच्या झाडलोटीपासून ते सजावट करण्यापर्यंत प्रत्येक गोष्टीत झोकून देऊन श्री गणरायांच्या स्वागताची तयारी केली.

Kind

Story

Place

Thane

Art

The Art of Memory (Dhāraṇā-mātṛkā) · Kala 62

Contributed by

Recorded, name withheld by the contributor

Submitted

17 September 2026

Accepted

17 September 2026