चवथीचो सण.. गणेशोत्सव..!!

चवथीचो सण... गणेशोत्सव..!! गणेशोत्सव हा महाराष्ट्रातील सर्वात मोठा आणि लोकप्रिय सांस्कृतिक व धार्मिक सण आहे.. तळकोकणात सिंधुदुर्ग जिल्ह्यातील दोडामार्ग तालुक्यातील घोटगेवाडी... निसर्गाच्या कुशीत तिलारी नदी काठी वसलेले गाव.. गावातील बहुतांश कुटुंब गोयकरी.. नोकरी धंदा व्यवसाय निमित्ताने गोव्यात व इतरत्र.मी रत्नागिरी लांजात.. नोकरी निमित्त. पण गणेशोत्सव अर्थात चवथीस न चुकता घरी. मोठ्या जल्लोषात हा उत्सव साजरा केला जातो. गणपती बाप्पाच्या माथ्यावर माटोळी बांधली जाते.ती रानातील विविध फळाफुलांनी सजवली जाते. बांधण्यासाठी केवनीचे दोर काढले जातात.. निसर्गाच्या सान्निध्यातील वनस्पतीचा वापर होतो.. पर्यावरणपूरक माटोळी असते ही..!! गणेशमूर्तीची घरोघरी प्रतिष्ठापना केली जाते.. घुमट आरती होते.. एकोपा जपला जातो. मोदक असतातच.. पण लाह्यांचे पंचखाद्य नी नेवऱ्या (करंज्या) हे स्पेशल. दिड दिवस अथवा पाच दिवस उत्साहात लहानथोर मंडळी तल्लीन होतात. गणपती बाप्पाला हरयाळी ( दूर्वा) वाहतात. उत्तर पूजा झाल्यानंतर बाप्पा च्या सोंडेवर तीर्थ सोडून प्राशन केले जाते..अतिशय श्रद्धापूर्वक, मनोभावे श्रीगणपती बाप्पाची सेवाचाकरी केली जाते.. आणि जड अंतःकरणाने.. 'गणपती बाप्पा मोरया, पुढच्या वर्षी लवकर या..!! ' या निनादात निरोप दिला जातो..बारमाही वाहत्या तिलारी नदीत एकत्रितरित्या विसर्जन केले जाते. किती उत्साह नी आनंद असतो प्रत्येकाच्या चेहऱ्यावर.. एक ऊर्जा मिळते ... !!

Kind

Story

Place

Ratnagiri

Art

Flower Displays (Puṣpa-śakaṭikā) · Kala 26

Contributed by

Recorded, name withheld by the contributor

Submitted

17 September 2026

Accepted

17 September 2026